உங்கள் கடிதம் கிடைத்தது

நேற்று நீங்கள்
எனக்கு எதிராக எழுதிய கடிதம்
சில எழுத்து பிழைகளோடு கிடைத்தது.

முதலில்
நீங்கள் அனுப்பிய முகவரி எண் தவறு...

இப்போது அந்த வீட்டில்
இருக்கும்
அழுக்கடைந்த கிழவியின்
நிகழப்போகும் மரணத்திற்கு
நீங்கள் காரணமாக இருப்பது
எவ்விதத்திலும் நியாமில்லை.

தன் மகனின்
கற்பனை முகத்தோடு
வாசிக்கத்தெரியாத அவளின் ஏக்கமும்
எனக்கான காத்திருப்பும்
உங்கள் கடிதத்தால் ஆபாசமாகியுள்ளது.

இரண்டாவது
உங்களின் பெயரை போட இயலாவிட்டாலும்
கிறுக்கலாக ஒரு
கையொப்பம் இட்டிருக்கலாம்.

வேறு வழியின்றி...
'பு'விலும்...'சு'விலும்...'ம'விலும்
தொடங்கும் பெயர்களை
உங்களுக்கு
வைக்கும் சிரமம் எனக்கு ஏற்பட்டுள்ளது.

உங்கள் கையெழுத்து அழகாக இருந்தது
ஆயினும் ஒரு ஆலோசனை...

கொஞ்சம் மென்மையான
காகிதத்தில்
அடுத்த கடிதம் எழுதினால்
அழுத்தி துடைத்து எரிந்தப்பின்
குதம் எரிச்சலாவது
குறையும் வாய்ப்புண்டு

ம.நவீன்